POSTUMUS

I.

POSTUMUS

Sylvius dictus est, postrema Aeneae proles, de quo sic Virgil. Aen. l. 6. v. 760.

Ille vides, purâ Iuvenis qui nititur hastâ,

Proxima sorte tenet lucis loca: Primus ad auras

Aetherias Italô commistus sanguine surget

Silvius, Albanum nomen, tua Postuma proles.

In quae verba Caesellius Vindex, apud A. Gellium, l. 2. c. 16. Postuma, inquit, proles non eum significat. qui Patre mortuô, sed qui postremô locô natus est, sicuti Silvius; qui Aeneâ iam sene, tardô serôque partu est editus. Unde etiam subicit Poeta:

Quem tibi longaevo serum Lavinia coniux

Educet silvis. ————

Vide et supra in voce Posthumi. Huic Ascanius, sine liberis desunctus, reliquit imperium: ab eoque omnes post illum Reges Albani Sylvii appellati sunt. Liv. l. 1. c. 3.

II.

POSTUMUS

ab avidis novarum rerum Gallis, imperante

Gallienô, ad Imperium vocatus et post septennium interemptus est, de quo vide supra, in Posthumius. Ita autem Salmas. legi vult, eo quod omnes libri Postumus prae se ferant. Sic Zonaras et Zosimus Ποςτοῦμος habent, Victor itidem et Eutropius. Nummi praeterea, IMP. C. POSTUMUS. P. F. AUG. Casaubonus tamen Inscriptionem suggerit, in qua C. CASSIUS. POSTUMIUS. LABIENUS. vocatur. Vide utrumque ad Trebellium Pollionem in XXX. Tyr. c. 2. et 3. et de voce Postumus, plura apud A. Gellium, l. 2. c. 16. Vide et Posthumus.